පිළිකාවට කථා කරන ජංගම දුරකථනය

ජංගම දුරකථන භාවිතය මොළයේ පිළිකා අවධානම ඉහල දමන බවට ලෝක සෞඛ්‍ය සංවිධානයෙන් අනතුරු ඇඟවේ.

මනුෂ්‍ය ලෝකයේ දියුණුවත් සමගම අත්වැල් බැඳ ගනිමින් නොයෙකුත් ව්‍යසනයන් හා රෝග කාරකද පෙරට වඩා හිස ඔසවන ආකාරය මෑත ඉතිහාසය තුල දක්නට ලැබුණු කරුණකි. බෝවන රෝගයන් බොහෝ දුරට තුරන් කර හෝ පාලනය කර ඇතත්, බෝ නොවන රෝග වල ව්‍යාප්තිය පසුගිය දශක දෙක තුනක කාලය ඇතුළත සීඝ්‍රයෙන් ඉහළ ගොස් තිබේ. මේ අතරින් පිළිකා වලට හිමි වන්නේ ප්‍රධාන ස්ථානයකි. නූතන වෛද්‍ය විද්‍යාව කෙතරම් දියුණු වූවත් පිළිකා ඇතිවන්නේ කෙසේද යන්න හෝ පිළිකා සඳහා නිශ්චිත ප්‍රතිකාර ක්‍රමයක් හෝ තවමත් සාර්ථකව ඉදිරිපත් කිරීමට නොහැකිව පවතී. ලොව පුරා සිදුවන මරණයන්ගෙන් 15% ක් පමණ සිදුවන්නේ පිළිකාවන් හේතුවෙනි. පාරජම්බුල කිරණ හා වෙනත් විකිරණයන්ට නිරාවරණය වීම, ඇස්බැස්ටෝස් / ආසනික් / දුම්වැටි වැනි පිළිකා කාරක ද්‍රව්‍යයන් හා පරපෝෂිත ජීවී සෛල පිළිකාවන් සඳහා මූලික හේතු සාධක ලෙස දක්වා තිබේ.

අධික ලෙස හා දීර්ඝ කාලීනව විකිරණයන්ට නිරාවරණය වීම පිළිකා සඳහා අත වැනීමකි. මේ යටතේ ජංගම දුරකථන භාවිතයද කලක් තිස්සේම විද්‍යාඥයන්ගේ විවාදයට බඳුන් වී තිබිණි. කෙසේ වෙතත් අධ්‍යයනයන්ට අනුව හෙලිවී තිබුනේ ජංගම දුරකථන භාවිතයෙන් මොලයේ පිළිකා ඇති වීමේ අවධානමක් ඇති නමුත් ඒ නොගිණිය හැකි තරම් කුඩා ප්‍රතිශතයක් පමණක් බවයි. දුරකථන නිෂ්පාදක සමාගම් විසින් මේ කරුණ ද වසන් කර තබන්නට කටයුතු කර තිබුණු හෙයින් සාමාන්‍ය ජනතාවට මෙහි ඇති අනතුර පිළිබඳව නිසි වැටහීමක් නොතිබිණි.

කෙසේ වෙතත් ලෝක සෞඛ්‍ය සංවිධානය පසුගියදා නිල වශයෙන් පිළිගන්නා ලද්දේ ජංගම දුරකථන භාවිතයත් සෘජු පිළිකාකාරක සාධකයක් බවයි. මේ නිසා ජංගම දුරකථන භාවිතය සීමා කළ යුතු බවට ඔවුන් අනතුරු අඟවා තිබේ. ලොව පුරා සිටින පිළිකා පිළිබඳ විශේෂඥයින් 30 දෙනෙකුගේ පමණ සහභාගීත්වයෙන්, ලෝක සෞඛ්‍ය සංවිධානයට අනුබද්ධිත පිළිකා පිලිබඳ වූ අන්තර්ජාතික පර්යේෂණ ආයතනය මගින් ප්‍රංශයේ ලියොන් නගරයේ සංවිධානය කෙරුණු රැස්විමකදී මේ කරුණු අනාවරණය කරන්නට යෙදිනි.

ජංගම දුරකථනයන්ගෙන් නිකුත් වන විකිරණ අයනීකාරක නොවන විකිරණ ගණයට වැටේ. තව දුරටත් පැහැදිලි කිරීමේදී මෙම විකිරණයන් X කිරණ (x-ray) තරමට හානිකර නොවන නමුත් අඩු-බලැති ක්ෂුද්‍ර තරංග උදුනක් (Microwave oven) මෙන් ක්‍රියාකරයි. මේ ක්ෂුද්‍ර තරංග නිසා ක්ෂුද්‍ර තරංග උදුනකදී මෙන්ම දුරකථනය නිසාත් අපේ කණ ආශ්‍රිත ප්‍රදේශයට බලපෑමක් ඇති කරන බව මෙයින් පෙන්වා දෙයි. මෙම සමුළුවේදී අදහස් පළ කල පිළිකා රෝග විශේෂඥයෙක් ප්‍රකාශ කර සිටියේ දිනකට විනාඩි 15 ක් ජංගම දුරකථනය පාවිච්චි කලත් එය සැලකිය යුතු අන්දමින් මොලයේ පිළිකා තත්ත්වයන් (Brain Tumors) සඳහා හේතුකාරක වන බවයි. මේ අනතුර සැබෑ ලෙසම වර්ධනය වීමට යම් කාලයක් ගත වන බවත්, වර්තමාන දුරකථන පාරිභෝගික පිරිස අනුව බැලූ විට තවත් අවුරුදු 20 ක පමණ කාලයකට පසු මොළයේ පිලිකාවන්ට ගොදුරු වූවන්ගේ සංඛ්‍යාව දැවැන්ත ලෙස ඉහළ යනු ඇති බවටත් ඔවුන් මත පල කර සිටී.

“සාමාන්‍යයෙන් පුද්ගලයෙක් දිනකට විනාඩි 15 කට වඩා තමන්ගේ ජංගම දුරකථනය භාවිතා කරනවා. මෙය අපට සුළු කාරණාවක් ලෙස පෙනෙන්නේ එයින් ඇතිවන ප්‍රතිඵල දීර්ඝකාලීන නිසායි. මෙහි ඇති නියම අනතුර ඉස්මතු වන්නේ අවුරුදු 20 කට පමණ පසුවයි. මෙය හරියටම කාල බෝම්බයක් වගෙයි. මොළයේ පිළිකාවක් වර්ධනය වීම සඳහා දිනකට විනාඩි 15 ක් ජංගම දුරකථනය භාවිතා කිරීමම ලොකුම හේතු සාධකයක්...” ඔවුන් වැඩි දුරටත් පවසා සිටිනවා.

මහජන සෞඛ්‍ය සංවිධාන විසින් මේ සඳහා යම් පියවරක් ගත යුතුව පවතින බවත්, මේ අන්තරාය ගැන ජංගම දුරකථන පරිශීලකයන් දැනුවත් කිරීමට කටයුතු කල යුතු බවත් මේ විශේෂඥ කණ්ඩායමේ අදහසයි. මෙම ප්‍රතිඵලයන්හි දැක්වෙන අගයන්ට වඩා නියම අනතුරේ ස්වභාවය 10% ක් පමණ පරිමාවකින් වැඩි වීමට ඉඩ තිබේ. අවුරුදු 7 ක භාවිතයෙන් මොළයේ පිළිකාවන් සඳහා 72% ක පමණ අනතුරක් ඇති විය හැකියි. “දුරකථන පරිශීලකයින් මේ පිළිබඳව බරපතල ලෙස සලකා බැලිය යුතුයි”යැයි හැරිස්බර්ග් රෝහලේ වෛද්‍යාචාර්ය බ්‍රිජ් සූඩ් පවසා සිටියේය.

මෙම අධ්‍යයනයන්හි නියම ප්‍රතිඵල විශ්ලේෂණය කිරීම සඳහා දීර්ඝ කාලයක් පර්යේෂණ සිදුකල යුතු බව මෙහිදී ප්‍රකාශ කෙරිණි. මෙහිදී ජංගම දුරකථන සමාගම් පවසන්නේ පර්යේෂකයන් විසින් මෙම ප්‍රතිඵල ගැන නිශ්චිතව මත පළකර නැති බවත්, මීට ඉහතදී පැවැත්වූ අධ්‍යයනයන් ගෙන්ද මෙවැනි ආකාරයේ අනතුරක් පෙන්වා දී නැති නිසා මේ ප්‍රතිඵල පිළිගත නොහැකි බවයි. මේ පිළිබඳව විද්වතුන්ගේ මතය නම් ජංගම දුරකථන සමාගම් කුමක් පැවසුවත් ජංගම දුරකථන භාවිතා කිරීම තමා විසින්ම පිළිකාවන්ට කථා කිරීමක් බවයි. ඔවුන් වැඩිදුරටත් පවසන්නේ දුරකථන තරංග හා විකිරණයන් කෙතරම් කුඩා වුවත් එහි දීර්ඝ කාලීන බලපෑම ඉතා දැඩි බවයි. ජංගම දුරකථනය වැනි එදිනෙදා බහුලව භාවිතා වන උපකරණයකදී මෙම තත්ත්වය වඩාත් බරපතල වන බව ඔවුන් පෙන්වා දෙයි. මේ සඳහා ගත හැකි සරලම පියවර නම් හැකිතාක් පමණ දුරකථනය කණ අසල තබා ගැනීම සීමා කිරීමයි. මේ සඳහා කන්-යොමු (hands-free) භාවිතා කරන ලෙසට උපදෙස් දී තිබේ. හැකිතාක් දුරට ජංගම දුරකථනය සිරුරෙන් ඈත්ව තබාගත යුතුයි. මෙමගින් පිළිකා අවධානම සැලකිය යුතු ලෙස අවම කර ගත හැක බව මේ විද්වතුන් පෙන්වා දෙයි.

අන්තර්ජාලය ඇසුරින් සකස් කලේ - චතුරංග පෙරේරා

රූ පරිගණක සඟරාව - 2011 අගෝස්තු කලාපය

මෙහි ඇතුළත් කර ඇති සියළුම ඡායාරූප Google Image Search ඔස්සේ ලබාගත් ඒවා වන අතර එහි අයිතිය මුල් හිමිකරුවන් සතුවේ.

---

---

---